சுயநினைவுகள் மூச்சுக் காற்றினில்
கலந்திடும் தருணம்..
எண்சாண் கூட்டின் அழிவினில்
சுகித்திருக்கும் (ம)ரணம்!

சுமைத்தாங்கி கனவுகள் மீதினில்
துடிக்கின்ற கரணம்..
வெற்றுடம்பு இனி தீய்வதனில்
பெற்றிடுமோ புது சலனம்!

ஆறடிக் கோட்டையின் மதிலினில்
காவலிருந்த கவனம்..
இன்றது பிறழ்ந்த குற்றந்தனில்
அரங்கேறியது என் தகனம்!

மானுட நிதர்சன வெளியினில்
நிலையுற்ற சயனம்..
இனி கட்டற்ற பரவெளியில்
தொடங்கிடுமோ என் பயணம்!

மரணம் என்பது, வாழ்வின் அடுத்த அத்தியாயத்திற்கு உன்னைத் தயார்படுத்தும் ஓர் ஔடதம்!
அதனை புறக்கணிக்காதே, மகிழ்வாக ஏற்றுக் கொள்!

மரண பயம் ஒழித்தவன், வாழ்க்கையை வென்றெடுத்தவனாகிறான்!